Втор ден расправа за ребалансот на буџетот: власта се фали со намален јавен долг- инаку ефект од инфлацијата

Инфлацијата го намали јавниот долг, ама власта си го препиша тоа на нивната успешна работа.

Од ВМРО- ДПМНЕ реагираат дека јавниот долг ќе надмине 8 милијарди евра и дека прекроената државна каса не е во функција на граѓаните. Владата со ребалансот ја намалува  проекцијата за економски раст од 4,6 % на 3.2 %, но прашање е и дали и овие проекции ќе се остварат.

Македонија во 2022 година ќе пробие уште една психолошка граница и јавниот долг ќе надмине 8 милијарди евра. Ако на 48% јавен долг СДСМ велеа дека не чека грчко сценарио, сега какво сценарио не чека? Македонија е една од земјите која има највисок пораст на јавниот долг од периодот пред корона кризата. Од кога се дојдени на власт, јуни 2017, па до крајот на оваа година ќе направат нов нето долг од над 3,5 милијарди евра, а капиталните расходи никогаш не биле пониски, изјави Игор Здравески од ВМРО- ДПМНЕ

Од Власта пак упорно тврдат дека успеале да го намалат јавниот долг на 55% од БДП, занемарувајќи ги реакциите од експертската јавност дека ова е ефектот на високата инфлација, односно   резултат на зголемените трошоци и цени, а не поради тоа што Владата ги вратила долговите.

Бележиме и пад на јавниот долг од 2,2 процентни поени и пад на државниот долг од 1,9 процентни поени во првиот квартал од оваа година. Овие успешни економски политики мора да продолжат и затоа е потребно овој ребаланс да биде усвоен од страна на пратениците, вели Лолита Ристова од СДСМ.

Од опозицијата реагираат и дека со ваквиот ребаланс има историско најниски капитални расходи.  Во услови на рекордна инфлација, Владата ќе одвои само 76 милиони евра  кои ќе се искористат за мерки за помош на граѓаните. Опозицијата реагира дека се предвидени средства од  извоз на храна, во моментите кога не се знае дали ќе имаме доволно храна дома.

Со прекројувањето , државата ќе не задолжи  речиси една милијарда евра. Досега се поднесени вкупно 204 амандмани од кои 174 од ВМРО- ДПМНЕ, 28 од Алијанса за албанците и 2 од СДСМ.  

Кристина Алексиеска