Со цел раздвижување на локалната економија, но и враќање на пулсот на веќе неколку години колабираната прилепска Стара чаршија, Општина Прилеп, во соработка со дуќанџиите и чаршискиот еснаф, вчера и денеска, за првпат организира „Аутлет викенд“. „Во борбата за спас на помалите бизниси и на занаетчиството кои се’ повеќе се во изумирање, мораме заеднички да бараме решенија за колку –толку да ги ублажиме ударите од сеопштата криза“, велат иницијаторите.

   „Ова му недостасуваше на Прилеп, ова е прв ваков организиран аутлет кој што го прави Прилеп еден голем шопинг-мол. Тоа што беше зад нас во овие две-три години го почувствува нашата прилепска економија, од стопанственици до трговци, па сакавме не само да се реанимира, туку и да покажеме дека се се може ако се сака со една ваква објава активно да ни се приклучат не само граѓаните од Прилеп, туку и од сите соседни општини, а денеска гледаме дека имаме гости и од подалечни градови“, – кажа Борче Јовчески, градоначалник на Прилеп.

   Енормно зголемените давачки, иселувањето, рапидно опаднатата куповна моќ на граѓаните, особено со Корона пандемијата, си го земаат својот данок, посочуваат од Регионалната занаетчиска комора кои се и коорганизатори на овој настан и тврдат дека сега ќе мора да се решаваат тие негативни „афтер шокови“.

  „Нормално е дека се зголемени сите трошоци за функционирање, а со тоа што се намали интересот за овој дел од градот, центаров и Старава чаршија, голема улога изигра и тоа што нема пристапни паркинг-места. И сега, во овој момент, повеќето од дуќаните кои што функционираа низ Старава чаршија и кои се затворени во моментов, или имаат најдено локација која што е на некое попристапно место, или некој и воопшто не работи повеќе…Мислам дека во соработка со ЛС ќе најдеме некое решение, кое можеби нема да биде најсреќно за сите, ама ќе најдеме решние за да го заживееме центаров“– рече Кирил Трпчески, претседател на Регионална занаетчиска комора, Прилеп.

  Од оваа идеа задоволни се и граѓаните, кои, како што велат, можат да си купат производи по значително пониски цени со надеж дека попустите ќе бидат реални.

   „Мислам дека е добар предлогот како што луѓево немаат пари. На некој ќе му дојде добредојде, на тие што планираат да купат“, вели анкетиран граѓанин.

  „Прошетавме, видовме, а нешто и си купувме малку. Супер е, да има и друг пат, одговара за сите луѓе“, – анкетирана граѓанка.    ,

Првиот „Прилеп аутлет викенд“ кој завршува денеска, освен со пониските цени  и до 70 проценти во дуќаните и угостителските објекти, беше збогатен и со забавно-музичка програма која се изведуваше на неколку пункта низ центартот од градот.

Каролина Дурло

Advertisements